USA: Umboðsmannatingið samtykt fíggjarlógina

Amerikanska umboðsmannatingið hevur samtykt fíggjarlógina, sum semja varð gjørd um fyrr í vikuni, og væntað verður, at senatið fer at gera tað sama.

Tí eru útlit fyri semju um amerikansku fíggjarlógini, sum skal galda hetta fíggjarárið, ið endar seinast í september. Semjan er um 6.000 milliardir kr., og ásetur útreiðslurnar hjá statinum, tað sum eftir er av fíggjarárinum. Tá senatið hevur samtykt fíggjarlógina, kann Barack Obama, forseti, skriva undir hana, so hon kemur í gildi.

Stórur meiriluti

Umboðsmannatingið samtykti uppskotið við stórum meiriluta. 359 atkvøddu fyri og 67 ímóti uppskotinum, teirra millum vóru tveir demokratar. Demokratarnir hava meiriluta í senatinum, og tí verður neyvan nakar trupulleiki at fáa uppskotið samtykt har.

Stór ósemja hevur verið um fíggjarlógina, og ósemjan hevði m.a.a við sær í oktober, at næstan ein millión fólk í almennum starvi vórðu send til hús í 16 dagar í oktober í fjør.