- Tíðindi, mentan og ítróttur
Her brenna 139 hús í norskari bygd í grund
![](https://kvf.fo/sites/default/files/styles/grein-ovasta-mynd/public/flatanger-eldsbruni01.jpg?itok=Nqx-fjMZ)
Skógareldurin kyknaði klokkan 22:30 norska tíð mánakvøldið, hóast kalt er í veðrinum og hetta ikki er árstíð fyri skógareldar í Noregi.
Sløkkiliðið í bygdini Hasvåg segði við NRK á middegi, at tey enn ikki hava fult yvirlit yvir støðuna. Higartil eru 139 hús í bygdini brend í grund, verður mett.
Skógareldurin byrjaði í bygdini Uran mánakvøldið, og hevur síðani breitt seg við vindinum vestureftir til fýra aðrar bygdir í Flatanger, har bygdirnar eru.
Trupult at basa skógareldin
Nógvur vindur í økinum við Flatanger hevur eisini gjørt tað sera trupult hjá sløkkiliðnum á staðnum at basa herviliga skógareldin.
Harumframt er tað eisini trupult at fáa neyðuga hjálp til tær fýra bygdirnar, sum eru raktar av skógareldinum, tí vegakervið er so vánaligt, skrivar NRK.
Nú verður roynt at byrgja økið við Flatanger av, til tess at forða fyri, at skógareldurin breðir seg enn meira, og kann elva til enn størri skaðar í øðrum grannabygdum.
Elleiðing kanska orsøk til skógareldin
Løgreglan í Flatanger hevði seinnapartin tíðindafund saman við kommununi, har kunnað varð um umfatandi skógareldin, sum kyknaði mánakvøldið.
- Vit hava ikki orsøk at halda, at annað enn elleiðingin í økinum er orsøk til skógareldin, sigur ein talsmaður hjá løgregluni sambært NRK.
Økið kring Flatanger er væl umtókt summarhúsøki. Mett verður, at av teimum higartil 139 húsunum, sum eru brend í grund, eru 70-80 summarhús.