Noreg sendir flóttafólkaskip til Miðjarðarhavið

Norska stjórnin hevur gjørt avtalu við reiðaríið, Siem Offshore, um at senda eitt skip til Miðjarðarhavið, sum skal taka flóttafólk umborð

Noreg sendir nú eitt skip til Miðjarðarhavið, ið skal hjálpa til í arbeiðinum at taka flóttafólk upp, hevur Noreg lovað ES

Mynd: Savnsmynd/AP

Sigmar Bláberg

Bjarni Mohr

18.05.2015 - 08:44

Tað var norski forsætisráðharrin, Erna Solberg, sum almannakunngjørdi avtaluna við norska felagið, og skipið liggur nú í Bergen, har tað verður riggað til.

Norska stjórnin hevur lovað ES at senda eitt skip til Miðjarðarhavið áðrenn 1. august. Tá stjórnin bað um tilboð, vístu 48 feløg tiltakinum áhuga. Skipið Siem Pilot, sum er bygt í 2010, fekk uppgávuna.

Fer um mánaðarskiftið

Ætlanin er at norska skipið skal fara til Miðjarðarhavið um mánaðarskiftið. Endamálið er at taka flóttafólk úr skipum og bátum, og føra tey til Italia. Skipið kann hava 500 flóttafólk umborð.

Norska løgreglan skal hava eftirlitið umborð á skipinum, og umboð fyri norsku verjuna skulu eisini við. Norska skipið skal vera partur av átakinum hjá ES í Miðjarðarhavinum, sum nevnist Triton, og skipið verður tøkt í seks mánaðir.

Tað er marknaeftirlitið hjá ES, tað eitur Frontex, sum skipar virksemið í Miðalhavinum.