Ukraina fær lán uppá góðar 13 milliardir krónur

Lánið skal hjálpa Ukraina at seta í verk búskaparligar nýskipanir og hjálpa landinum á føtur aftur eftir bardagarnar við russiskt vinarligu herliðini í Eystur-ukraina, sum hava kostað landinum dýrt. 

Ukraina er eisini undir trýsti fyri at fáa enda á tí umfatandi mutri, sum landið er illa plágað av. Stóra lánið varð játtað Ukraina á toppfundinum, sum stjórnarleiðarnir í ES hava hildið í Riga í Lettlandi. Á fundinum fingu Georgia og Moldova eisini lán frá ES.

Stjórnirnar í Ukraina, Georgia og Moldova eru allar fyri fullum limaskapi í Evropeiska samveldinum. Armenia, Azerbaijan og Hvítarussland hava ikki áhuga í limaskapi, men vilja hava nærri búskapar-samstarv við ES.

Leiðararnir í øllum hesum seks fyrrverandi sovjettisku lýðveldunum vóru bodnir við á ES toppfundin í Riga. Amnesty sigur í eini nýggjari frágreiðing, at í Ukraina eru prógv fyri, at báðir partar í stríðnum hava pínt fangar, og at russiskt vinarligu uppreistrarliðini hava framt deyðadómar uttan rættargongd.