Hóttir við at leggja frá sær, atkvøða grikkar fyri

Tað segði Yanis Varoufakis í samrøðu við sjónvarpsrásina, Bloomberg. Grikkar skulu sunnadagin annaðhvørt seta kross við ja ella nei um uppskotið hjá altjóða lánveitarunum, sum skal bjarga Grikkalandi úr búskaparligu kreppuni, sum landið er í.

Verður undirtøka fyri uppskotinum, er tað ósigur fyri stjórnina við Alexis Tsipras í oddinum, sum hevur heitt á grikkar um at atkvøða ímóti uppskotinum.

Yanis Varoufakis sigur við Bloomberg, at um fólkaatkvøðan endar við, at grikkar atkvøða fyri, verður hann ikki fíggjarmálaráðharrin mánadagin.

Kreditorar ynskja nýskipan

Tsipras skrivaði í síðstu viku út fólkaatkvøðu orsakað av, at samráðingarnar millum Grikkaland og altjóða kreditorarnar, - ES, altjóða gjaldoyragrunnurin og evropiski miðbankin, slitnaðu.

Kreditorarnir vilja hava víðgangandi nýskipanir í grikska samfelagnum, - eitt nú at pensjónsaldurin hækkar og at mvg'ið skal hækka.

Alexis Tsipras segði, tá orðaskifti var í parlamentinum um uppskotið frá kreditorunum, at tað var ein háðan móti grikska fólkinum. Fólkaatkvøðan verður sunnudagin 5. juli.