Cliff Richard verður ikki skuldsettur

Ákæruvaldið hevur ikki nóg mikið av prógvum til, at sangarin, Cliff Richard, kann skuldsetast fyri kynsligan ágang móti einum drongi

Skuldsetingarnar móti Sir Cliff Richard verða sleptar, tí prógvini ikki eru nóg góð, hevur ákæruvaldið gjørt av. Hann var ákærdur fyri kynsligan ágang fyri meira enn 20 árum síðani

Bjarni Mohr

16.06.2016 - 13:27

Skuldsetingar, um kynsligan ágang móti einum drongi undir 16 ár, eru ikki haldgóðar. Tí verður Sir Cliff Richard ikki skuldsettur fyri kynsligan ágang.

Tað er niðurstøðan hjá bretska ákæruvaldinum, ið hevur kannað prógvini í málinum, har Cliff Richard var ákærdur fyri kynsligan ágang í einum máli, sum er eldri enn 20 ár.

Noktaði seg sekan

- Vit hava avgjørt, at tað ikki eru nóg góð prógv til at rættarsøkja, sigur høvuðsákærin, Martin Goldman, sambært tíðindastovuni Reuters.

Cliff Richard hevur noktað seg sekan í øllum ákærum. Hann varð avhoyrdur í málinum, men hevur hvørki verið handtikin ella skuldsettur.

Bretski sangarin, Sir Cliff Richard, kemur til Føroya í summar, tá hann í august syngur á ársins Summarfestivali í Klaksvík.