Óttast ruðuleika í august

Vandi er fyri, at olympisku leikirnir, sum verða í Rio de Janeiro í august, kunnu enda í ruðulleika, heldur ein guvernørur.

Serliga illa fyri er landsparturin Rio de Janeiro, tí lækkandi inntøkur av oljuni seta síni djúpu spor.

Tí ávarar virkandi guvernørurin í landspartinum, Francisco Dornelles, um, at vandi er fyri at olympisku leikirnir kunnu enda í eini vanlukku.

Øll tilbúgvingin kann steðga

Landsparturin, Rio de Janeiro, hevur fingið boð um, at hann fær 7,6 milliardir krónur frá stjórnini, men pengarnir eru ikki komnir.

Tí er vandi fyri at øll tilbúgvingin steðgar, millum annað tí løgreglan ikki hevur pengar til oljunýtslu í akførunum.

Ein metrostøð sum skuldi flyta áskoðarar til ymsu tiltøkini í landspartinum er heldur ikki liðug. Tað resta 2,5 milliardir krónur í fyri at fáa gjørt støðina lidna.

Zika-virus hóttir eisini

Umframt vánaliga undirstøðukervið, so hóttir eisini zika-virusið landið, og so seint sum í mai heittu fleiri serfrøðingar og granskarar á stjórnina um at útseta olympisku leikirnar í tríggjar til seks mánaðir.

Ein, sum skrivaði undir áheitanina, var Arthur Caplan, professari. Hann sigur, at tað fer at taka tríggjar til seks mánaðir at fáa eina vaksinu ímóti zika-virus, og tí hevði verið rættast at útsett OL.

Fleiri kend ítróttarfólk í Brasil hava eisini ávarað ímóti støðuni í landinum. Fyrrverandi fótbóltsleikarin, Rivaldo, hevur beinleiðis heitt á fólk um at halda seg burtur úr Rio, tí í býnum eru tey í vanda.