300.000 teldupostar hjá AKP á netinum

WikiLeaks almannakunngjørdi í gjárkvøldið næstan 300.000 teldupostar við fleiri hundrað túsund dokumentum, sum hava eitthvørt við flokkin hjá turkiska forsetanum, Erdogan at gera. Flokkurin, AKP, hevur meirilutan í turkiska tjóðartinginum.

Erdogan var við at stovna flokkin, Rættvísis- og menningarflokkin í 2001, men eftir at hann gjørdist forseti, hevur hann einki beinleiðis tilknýti til flokkin.

Keldan einki við kvettroyndina at gera

WikiLeaks upplýsir, at bólkurin fekk skjølini eina viku fyri kvettroyndina í Turkalandi, har minst 230 fólk lótu lív.

WikiLeaks sigur seg hava kannað upprunan til skjølini, og niðurstøðan er, at keldan einki hevði við kvettroyndina at gera og heldur ikki hevur tilknýti til nakran politiskan flokk í nøkrum landi. 

WikiLeaks gjørdi skjótt av at almannakunngera skjølini, helst tí Erdogan, forseti fer fram við harðari hond eftir kvettroyndina. WikiLeaks boðar frá, at hesi skjølini eru bara tey fyrstu í eini røð av skjølum um turkiska stjórnarflokkin.