H71 aftur í eldin eftir søguligan sigur

Í kvøld fæst at vita, um føroyameistarnir í manshondbólti, H71 í Hoyvík, eru mentir at spæla seg víðari í evropeisku EHF-kappingini fyri meistaralið í manshondbólti.

Púra óvæntað vunnu føroyameistarnir fyrra dystin móti slovenska meistaraliðnum RK Maribor Branik í høllini á Hálsi í Havn fríggjakvøldið. Úrslitið var 25-24 til H71.

Seinni og avgerandi dysturin um hvat av hesum báðum liðunum heldur fram í kappingini verður spældur í høllini á Hálsi í Havn í kvøld. Útvarpið hevur beinleiðis frásøgn frá dystinum, sum byrjar klokkan sjey.