Metmaðurin flytur mørkini

Jónas Isaksen heldur fram við at seta føroysk met í frælsum ítrótti.

Í dag gjørdist ungi rennarin danskur U20-meistari og setti samstundis føroyskt innandura met í 200 metra renning við tíðini 21,83 sekund. Hann brúkti sostatt minni enn 11 sekund upp á hvørjar 100 metrar.

Síðsta góða árið hevur rennarin úr Bragdinum tikið eitt met fyri og annað eftir, og á Ítróttafagnaðinum hjá ÍSF var hann í uppskoti til stjørnuskotið 2022. Venjarin hjá Jónasi, Jógvan Kristiansson Glerfoss, vann heiðurin sum ítróttafyrimyndin.