Netanyahu góðtekur ikki krøv frá Hamas

Treytirnar, sum Hamas hevur sett fyri at lata ísraelskar gíslar leysar, verða ikki gingnar á møti. 

Tað sigur ísrelski forsætisráðharrin, Benjamin Netanyahu, ið ikki vil góðtaka gíslatreytirnar.  

- Hamas krevur, at vit taka herdeildirnar aftur úr Gasa, gevast við krígnum og lata allar dráps- og neyðtøkumenn hjá Hamas leysar. Eg kann als ikki góðtaka krøvini, sigur Netanyahu í einari viðmerking við ísrelska miðilin Haaretz, sambært Reuters. 

Hava framvegis 132 gíslar

Í november vórðu annars fleiri gíslaavtalur gjørdar millum stríðandi partarnar. Tá læt Ísrael fleiri enn 240 fangar leysar úr ísrelskum fongslum aftur fyri fleiri enn 100 ísraelskar og útlendskar gíslar.

Sambært ísraelskum myndugleikum hevur Hamas framvegis 132 gíslar.

Í gjár var kunngjørt, at fleiri enn 25.000 fólk eru deyð í Gasageiranum, síðani ísrael gjørdi innrás eftir álopini í ísrael 7. oktober. Harumframt eru 62.000 fólk særd, síðani álopini byrjaðu.

Í gjár fanst ST-aðalskrivarin hvassliga at Ísrael fyri blóðiga kríggið.

- Ísraelska innrásin hevur havt við sær hópoyðileggingar og dráp á sivilfólk, sum eg ikki hava sæð í míni tíð sum aðalskrivari. Tað er hjartanemandi og kann als ikki góðtakast, segði António Guterres.