Ísrael bjargað tveimum gíslum

Ísraelski herurin sigur seg hava bjargað tveimum gíslum. 

Tað skrivaði AP-tíðindastovan í nátt.

Ísraelski herurin sigur, at í eini hernaðaratsókn í Rafah mánanáttina vóru tveir gíslar bjargaðir úr fangaskapi í Gasageiranum.

Talan er um 60 ára gamla Fernandi Simon Marman og 70 ára gamla Louis Har, skrivar AP-tíðindastovan.

Tiknir gíslar 7. oktober

Báðir vóru burturfluttir úr kibbutsini, Nir Yishak, í álopinum hjá Hamas á Ísrael 7. oktober.

Sambært herinum, hava báðir menninir tað gott. Teir eru millum gíslarnar, sum Hamas, sambært Ísrael, framvegis hevur.

Samstundis er boðað frá hørðum álopum á Rafah. 

Palestinskir myndugleikar hava boðað frá, at fleiri tíggjutals fólk hava latið lív ella eru særd.