Februar fer helst at seta hitamet

Februar mánaður fer eftir øllum at døma at vera tann heitasti februar, sum higartil er mátaður á jørðini. Og tað sama verður ivaleyst við mars mánaði.

Tað sigur Eigil Kaas, professari í veðurfrøði og veðuralisfrøði á Niels Bohr-stovninum í Keypmannahavn.

Hitin á jørðini er seinnu árini hækkaður rættiliga ógvisliga, sigur professarin og greiðir frá, at serliga hevur seinasta hálva árið verið óvanligt.

Fyribils tøl frá lærda háskúlanum í Maine í USA vátta eisini, at februar fer at seta øll hitamet.

Sambært The Guardian hava mátistøðir í Suðurafrika, Saudiarabia, Indonesia, Japan og Belis seinastu vikuna skrásett hitamet.

Eisini í Marokko hava 12 mátistøðir mátað hita yvir 33,9 stig, sum er met fyri higartil heitasta vetrardagin har.