Ítróttaumhvørvi: Børn og ung skulu kenna seg trygg

Hvussu skapar tú eitt trygt og gott ítróttaumhvørvi fyri børn og ung í Føroyum?

Tann spurningin seta Fótbóltssamband Føroya og Ítróttasamband Føroya á breddan komandi mánaðirnar. 

Startskotið ljóðar hósdagin, tá belgiski serfrøðingurin, Tine Vertvommen, hevur fyrilestur í Smæruni í Havn.

Hon er Phd í tryggum ítróttaumhvørvum og hevur staðið fyri størstu evropeisku kanningini um evnið.

- Á hesum tiltakinum fáa vit grundleggjandi vitan um trygd og trivnað hjá børnum og ungum. Vit hoyra eisini um, hvussu og nær mørkini verða brotin - og hvørjum vit skulu hyggja at fyri at síggja ábendingar um, at børnini ikki kenna seg trygg, skrivar ÍSF.

Fyrilesturin er liður í málinum hjá ÍSF um, at øll skulu kunna íðka og vera partur av ítróttaliga felagsskapinum á hóskandi stigi og undir tryggum kørmum.