63 mótmælisfólk handtikin í Georgia

63 mótmælisfólk eru handtikin í sambandi við stór mótmælistiltøk í Georgia.

Tað upplýsir innanríkismálaráðið í Georgia sambært Ritzau.

Mótmælini eru byrjað í kjalarvørrinum á lógaruppskoti, sum millum annað sigur, at felagsskapir, miðlar og fyritøkur, sum eru fíggjað við meira enn 20 prosentum úti úr heimi, skulu skrásetast at røkja útlendsk áhugamál.

Georgia er góðkent at kunna gerast limur í ES, hóast landið ikki hevur fingið limaskap enn. 

Mótmæli í Georgia

(Mynd: AFP/Ritzau Scanpix)

ES: Lógin forðar fyri integratión

Men ES hevur funnist at lógaruppskotinum, tí hildið verður, at lógin forðar fyri integratión í ES, verður hon samtykt. Eisini verður funnist at harðrendu viðferðini, sum myndugleikarnir hava givið mótmælisfólkunum.

- Eg fordømi harðskapin, sum mótmælisfólk hava verið fyri í Georgia. Hesi fólk mótmæla friðarliga ímóti lógini um útlendska ávirkan, skrivar uttanríkisráðharrin í ES, Josep Borell, á sosiala miðlinum X.

Onnur, sum finnast at, kalla lógaruppskotið fyri "ta russisku lógina."

Hetta gera tey, tí líknandi reglur eru galdandi í Russlandi, og sum sambært Ritzau eru settar í verk fyri at revsa politisk mótstøðufólk.