Talvlandsliðið beit frá sær

Talvlandsliðið tapti í gjár ikki óvæntað fyri Rumenia, sum er styrkismett sum nummar átta í talvolypiaduni í Budapest.

Kortini eydnaðist føroysku telvarunum at fáa tvey remis, so tað gjørdist 3-1 til Rumenia, ið hevði stórmeistarar á øllum borðum.

Helgi Dam Ziska og Rógvi Egilstoft megnaðu at fáa hálvt stig í part, meðan Høgni Egilstoft Nielsen og Luitjen Akselsson Apol máttu lúta.

Í dag telva Føroyar ímóti Irak, ið er styrkismett lægri, og sum Føroyar hava vunnið ímóti báðar ferðirnar, londini hava møtst, í 1972 og 1984.

Føroyar hava eftir fýra umfør tapt tveir dystir og vunnið tveir, og eru nummar 75 av teimum 187 londunum, sum eru við.