Her er búmerkið hjá Oyggjaleikunum 2027

Yvir 50 uppskot komu inn til búmerkjakappingina hjá Ítróttasambandi Føroya, men dómsnevndin valdi tað hjá Robert Gutke

Búmerkið til Oyggjaleikirnar í Føroyum í 2027 varð avdúkað í dag. Robert Gutke vann í kapping við 50 onnur uppskot

26.09.2024 - 14:41

Fyrr í summar skrivaði ÍSF út búmerkjakapping til Oyggjaleikir 2027, og í dag varð vinnandi búmerkið, sum Robert Gutke av Eiði eigur, avdúkað.

Aldur, vindur, rørslur, breytir og veðrahorn eru nakað av tí, sum sæst aftur í búmerkinum, sum ein samd dómsnevnd valdi millum tey 51 innkomnu uppskotini, skrivar ÍSF.

240926_ROBERTGUTKE_NET

Seks fólk vóru í dómsnevndini. Anna Maria Toftegaard, ÍSF, Barbara M. Lamhauge og Heidi Andreasen, Sansir, Niels Mortensen, Oyggjaleikanevndin 27, Hansina Iversen, næstforkvinna í LISA og Høgni E. Magnussen, grafikari í Kringvarpi Føroya.

Arbeiðið við at gera heimasíðu og samleika til Betri Oyggjaleikir 2027 fer nú í gongd. Samskiftisfyritøkan Sansir hevur fingið ta arbeiðsuppgávuna, og eftir ætlan verður heimasíðan almenn í juli næsta ár, tá ið oyggjaleikirnir í Orknoyggjum eru av.

Betri Oyggjaleikir 2027 verða í døgunum 3.-9. juli, og tá fara eini 2.500 ítróttafólk at kappast í 14 ymsum ítróttagreinum í Føroyum.

Loading Poll...