Nýggja landstingið í Grønlandi hevur havt sín fyrsta fund

Í dag kom nývalda grønlendska tingið - Inatsisartut - saman fyri fyrstu ferð. 

Hans Enoksen, sum er elsti tinglimur, setti tingfundin og minti tinglimirnar á, at antin bylgjurnar ganga høgt ella øll eru samd um kósina, er tað fyrst og fremst fólkinum, sum tingið skal arbeiða fyri.

Ein av fyrstu uppgávunum hjá nýggja tinginum verður at góðkenna nýggja landsstýrið Naalakkersuisut, sum tí eisini tekur við í dag.

Jens-Frederik Nielsen úr Demokraatit verður nýggjur landsstýrisformaður.

Undanmaður hansara, Mute B. Egede úr IA, verður nú landsstýrisformaður í fíggjarmálum. Og Vivian Motzfeldt úr Siumut, har hon nú eisini er blivin floksforkvinna, heldur fram sum landsstýriskvinna í uttanríkismálum.