Fakfeløgini fyrireika framvegis krøvini um lønarkarm

Tey sjey fakfeløgini á almenna arbeiðsmarknaðinum, sum ætla at samráðast við Fíggjarmálaráðið og Kommunala arbeiðsgevarafelagið um karmin í nýggja sáttmálanum, fyrireika framvegis samráðingarnar.

- Í løtuni situr arbeiðsbólkur og finnur lyklatøl at brúka í samráðingunum, sigur Súni Selfoss, formaður í Starvsfelagnum, í sms-boðum.

Krøvini er tí ikki handað. 

Samráðast hvør sær

- Verða vit samd um at fara víðari, eftir at lyklatølini eru funnin, verða felags samráðingar bara um karmin. Feløgini fara at samráðast um nýggjan sáttmála hvør sær, sigur Súni Selfoss. 

Spurningurin, um samráðst verður í krónum ella prosentum, er ikki viðgjørdur enn, sigur Súni Selfoss. Hann væntar nýggjan tvey ára sáttmála.

Talan er um nýggjar sáttmálar fyri Starvsfelagið, Akademikarafelagið, Búskapar- og løgfrøðingafelagið, Yrkisfelagið fyri miðnám, Kost- og føðslufelagið, Farmankonomfelagið og Yngri læknar.