Jana og Viborg spældu seg í evropeiskt bólkaspæl

Jana Mittún skeyt fýra mál og átti næstsíðstu hond á fleiri, tá Viborg vann 39-30 á IK Sävehof og vann seg í European League-bólkaspælið.

Ungi føroyski bakspælarin, sum fyri kortum longdi sína avtalu við danska felagið til 2028, spældi ein góðan dyst og skal nú royna seg í bólkaspælinum í næstbestu evropeisku kappingini hjá EHF, sum byrjar næsta ár.

Viborg hevur eisini spælt seg í hálvfinalurnar ella sonevnda Final Four í donsku steypakappingini, sum verður spælt millum jól og nýggjár. 

Harumframt hevur venjarin Anders Friis eisini longt um sín sáttmála til 2028.

Næst á skránni hjá Janu Mittún er annars HM í hondbólti. Hon og hinar 17, sum eru tiknar út til hópin, møta til venjingar í Føroyum mánadagin 17. november, áðrenn venjingardystin ímóti Íslandi við Tjarnir leygardagin 22. nevember. 

Í sjálvari heimsmeistarakappingini leggja Føroyar út 26. november við dysti ímóti Montenegro, sum vann á Føroyum í EM-undankappingardysti við Tjarnir fyri kortum.