Banamaðurin hjá Føroyum ikki við hesa ferð

Var tað ein maður, sum føroyska verjan ikki fekk bilbugt við, tá Føroyar spældu sín fyrsta EM-dyst yvirhøvur ímóti Slovenia í 2024, var tað Miha Zarabec.

Knappi bakkurin, sum í spælistíli minnir ikki so lítið um Elias Ellefsen á Skipagøtu ella Óla Mittún, gjørdi veruliga vart við seg í seinna hálvleiki og var helst høvuðsorsøkin til, at slovenar vunnu 32-29 ta ferðina.

Honum nýtast føroyingarnir ikki at stúra fyri, tá teir bresta saman við Slovenia í triðja dystinum í bólkaspælinum í Oslo, tí 34 ára gamli bakspælarin úr Wisla Plock er ikki tikin út til slovenska EM-hópin - ikki í fyrstu syftu í øllum førum - tí hann er skaddur. 

Strikuspælarin Blaž Blagotinšek úr Flensburg og bakkurin Borut Mačkovšek úr Pick Szeged teljast millum aðrar stuðulsspælarar, sum ikki eru við í hópinum fyribils.

Stórur hópur og drúgvar fyrireikingar

Slovenski venjarin Uros Zorman hevur tikið heili 22 spælarar út, og lagt verður upp til, at nakrir skulu sáldast frá áðrenn sjálvt endaspælið. 

Slovenia skal spæla venjingardyst ímóti Kuvait á heimavølli, áðrenn leiðin gongur til París, har dystir ímóti Íslandi og antin Eysturríki ella Fraklandi eru á skránni. 

Fyrsti EM-dysturin hjá Slovenia verður ímóti Montenegro, síðan spæla slovenar ímóti Sveis áðrenn dystin ímóti Føroyum 20. januar.

Slovenski EM-hópurin

Málverjar

Jože Baznik, Pays d'Aix Universite Club Handball (Frakland)
Miljan Vujović, TVB Stuttgart (Týskland) 
Klemen Ferlin, RK Celje

Vengur

Tilen Kodrin, VFL Gummersbach (Týskland)
Staš Slatinek Jovičič, RD LL Grosist Slovan
Tim Cokan, SPR Wisla Plock (Pólland)
Blaž Janc, Barcelona (Spania)
Domen Novak, Flensburg-Handewitt (Týskland)

Bakkar

Janez Guček, RK Trimo Trebnje
Nik Henigman, C'Chartres Metropole HB (Frakland)
Mitja Janc, SPR Wisla Plock (Pólland)
Tarik Mlivić, RD LL Grosist Slovan
Aleks Vlah, Aalborg (Danmark)
Domen Makuc, Barcelona (Spania)
Jaka Malus, RD LL Slovan
Domen Tajnik, HC Eurofarm Pelister (Norðurmakedónia)
Nejc Cehte, Füchse Berlin (Týskland)
Timotej Grmšek, RK Trimo Trebnje

Strikur

Lan Grbić, Trimo Trebnje
Kristjan Horžen, VfL Gummersbach (Týskland)
Matic Suholežnik, Saran Loiret (Frakland)
Stefan Žabić, Rokometni Klub Celje Pivovarna Lasko