Jana er troytt av at misnýta málmøguleikar

Føroyar taptu í gjár 32-27 fyri Montenegro í fyrsta umfarinum í bólkaspælinum í HM-endaspælinum í Týsklandi og Hollandi. Føroysku spælararnir iðraðu seg um fleiri misnýttar málmøguleikar. Ein av teimum er Jana Mittún, sum ætlar at stilla kanónina til dystin móti Spania.

- Vit hava leingi arbeitt við at fáa útnyttað okkara málmøguleikar betri. Nú eri eg troytt av, at tað altíð er tað, sum manglar hjá okkum. Tað er nakað, sum eg fari at fyrireika meg væl uppá. Eg vil gjarna hava eitt ella tvey stig, men nú fáa vit at síggja hvussu langt tað røkkur, sigur Jana Mittún.

Dysturin í gjár móti Montenegro var ein kropsliga harður dystur fyri føroysku spælararnar. Soleiðis verður eisini í annaðkvøld, tá Føroyar møta Spania.

- Tær hava nakrar kropsligar sterkar og stórar spælarar. Vit skulu spælara okkara skjóta spæl og fáa mál í kontrafasuni, sum er ein av okkara styrkjum. Tað verður eins og móti Montenegro, at vit skulu runt um strikurnar og ansa eftir teirra skjótu spælarunum á bakkunum, sigur føroyski landsliðsspælarin.

Jana Mittún er helst okkara týdningarmiklasti spælari. Hon fekk seg veruliga roynda í dystinum móti Montenegro, men hóast hon merkir dystin í kroppinum, so verður hon til reiðar í annaðkvøld.

- Eg eri væl fyri. Eg merki eitt sindur í kroppinum og havi kanska eitt trælær, men tað hugsi eg ikki um til dystin í morgin, sum eisini verður ein kropsliga krevjandi dystur. Og tað er vit til reiðar til, sigur Jana Mittún.

Føroyar spæla móti Spania í annaðkvøld klokkan 19.30. Dagur og Vika er framskundað til klokkan 18.30, og undansendingin til hondbóltsdystin byrjar klokkan 19.