Jana: - Vit fara at fáa ilt ímóti Serbia

Eftir ein rótutan og harðan dyst móti Týsklandi, so var Jana Mittún eitt sindur irriterað yvir sín egna innsats móti Týsklandi.

Men stutt er ímillum dystirnar, og tí snýr tað seg um at taka tað góða við sær frá undanfarna dysti og hugsavna seg skjótt til næstu avbjóðingina.

Nú bíðar Serbia – eitt lið, sum er kent fyri at spæla hart.

- Vit mugu vera fyrireikaðar upp á, at tær kunnu finna upp á at fara yvir dómaralinjuna, og vit fara at fáa ilt, men vit mugu vera klárar at geva aftur av somu skuffu, sigur Jana Mittún.

Hon leggur afturat, at hóast avbjóðingin verður stór, so livir dreymurin framvegis um eitt pláss í fjórðingsfinaluni.

- Vit vita, at tað verður trupult, men vit fara at royna at gera okkara besta, sigur hon.