100 milliónir fólk kunnu enda í fátækradømi

Tað er munandi verri enn í mai, tá Heimsbankin metti, at 60 milliónir fólk fóru at enda í fátækradømi orsakað av koronu.

– Verður gongdin tann sama, ella versnar, so fara nógv fleiri at merkja fátækradømið av álvara. 100 milliónir fólk kunnu enda í ógvusligum fátækradømi, sigur stjórin í Heimsbankanum.

Ógvusligt fátækradømi er, tá fólk vinna minni enn 1,9 dollarar um dagin, sum er minni enn 17 krónur.

Skuldin hjá fátæku londunum strikast

G-20 londini hava longu samtykt at úseta lánini hjá teimum londunum sum eru ringast fyri, árið út, og fleiri lond siga seg verða sinnað at leingja avtaluna í 2021, men tað er ikki nóg mikið, sigur Malpass.

Hann mælir til, at ríku londini strika skuldina hjá fátæku londunum, einki annað hjálpir londunum, sigur Heimsbankin.

Kreppan hevur við sær, at fátæku londini hava nóg mikið at hugsa um fyri at hjálpa fólkinum sum frægast, og tí hava tey ikki pengar til annað, sigur Malpass.

Heimsbankin metti í juni, at heimsbúskpaurin stendur fyri størsta hóttafalli í 150 ár, tí talið av londum, har búskapurin minkar, hevur ikki verið hægri síðani í 1870, ella í 150 ár, skrivar NTB.