H71 fær mótstøðulið úr Sveis

Kvinnurnar hjá H71 skulu spæla ímóti Spono Eagles úr Sveis í triðja umfari Evropa Cup-kappingini hjá EHF. Tað er greitt eftir lutakast seinnapartin.

Fyrri dysturin verður sambært lutakastinum í Sveis vikuskiftið 13./14. november, meðan seinni dysturin verður á heimavølli eina viku seinni. Tað skrivar H71.fo.

Tó fara hoyvíkingarnir at vita, um tað ber til at spæla báðar dystirnar í Føroyum eins og í seinasta umfari.

Spono Eagles úr Sveis er eins og H71 stovnað í 1971, og felagið hevur verið við í evropeiskum kappingum síðan níti-árini, skrivar heimasíðan hjá H71.