Samferðslupakkin kann fáa tað at ridla aftur undir samgonguni

Seinnapartin hósdagin í næstu viku fer aftur at bróta í bæði borð hjá samgonguni.

Tí tá skal løgtingið viðgera samferðslupakkan hjá landsstýrinum.

Talan er um fýra lógaruppskot.

Avgjaldið á brennievni hækkar

Landsstýrið ætlar at hækka prísin á bensini, dieseli og tungolju 13 oyru liturin.

Og 300 kr. verða lagdar omaná vegskattin, tó ikki fyri legu- og viðfestivognar og motorsúkklur.

Hækkingin skal koma í gildi 1.juli.

Jørgen Niclasen

Gongur ímóti samgonguskjalinum

Hesar avgjaldshækkingar smakka ikki væl hjá øllum í samgonguni. 

Í samgonguskjalinum stendur, at førdur verður ein eggjandi skatta- og avgjaldspolitikkur.

Farmagjøldini hjá Strandfaraskipum landsins skulu eisini hækka fyri at fíggja avloysaraskipið, sum skal keypast fyri Smyril. 

Jørgen Niclasen, Bárður á Steig Nielsen, Jenis av Rana

Ætla at strika ferðslustuðul

Eitt annað uppskot er, at eingin serligur ferðastuðul verður latin, tá ferðast verður í undirsjóvartunlum. 

Vágatunnilin og Norðoyatunnilin verða ókeypis at brúka, sigur landsstýrið í samferðslupakkanum.

Og ætlanin er at selja partabrøv hjá landinum í partafeløgunum Tjaldri og Smyril Line.

Norrøna, Smyril Line, Risin og Kellingin, ferðavinna, ferðafólk,

Javnvigar

Samanumtikið javnvigar samferðslupakkin í rakstri og hevur eitt avlop, sum er 19 mió. kr., sambært lógaruppskotunum hjá landsstýrinum.

Øll uppskotini verða viðgjørd undir einum og fara síðani í Fíggjarnevndina.