Jónas tvey nýggj føroysk met

Jónas Isaksen úr Bragdinum hevur um vikuskiftið sett tvey nýggj føroysk met í DMU-kappingini í Hvidovre.

Evnaríki íðkarin tók metini á 400- og 200 metra teininum. Hann átti sjálvur gamla metið á 400 metrum upp á 49,19 sekund, sum hann setti til U18-EM í Ísrael, har hann umboðaði danska landsliðið í frælsum ítrótti.

Nýggja metið er 48,45 sekund, og hann varð við tí danmarksmeistari fyri ungdóm. 

Á 200 metrum eydnaðist eisini at seta nýtt føroyskt met. Tórur Mortensen átti gamla metið upp á 22,43 frá 2019, men Jónas Isaksen rann teinin upp á 22,36 sekund. Hann endaði á triðja plássi.

Í longdarlopi vann Jónas Isaksen danska ungdómsmeistaraheitið. Hann leyp 6,67 metrar; eitt sindur styttri enn hansara besta lop upp á 7,15.