Trump roynir at forða fyri at onnur stilla upp

- At Donald Trump nú boðar frá, at hann stillar uppaftur til amerikanska forsetavalið í 2024, er ein roynd at byrgja fyri, at onnur republikansk valevni eisini fara at royna seg.

Tað sigur tíðindamaðurin hjá TV2 í USA, Jesper Steinmetz.

- Hann roynir at seta seg á flokkin og tryggja sína støðu sum valevni hjá republikanarunum, sigur hann.

Donald Trump ger eisini vart við sína støðu mótvegis floksfelaganum, Ron DeSantis, sum er guvernørur í Florida.

Hevur góðan møguleika

DeSantis fekk eitt gott úrslit á miðvalinum herfyri, og hann verður hildin at hava góðan møguleika at gerast forsetavalevni hjá republikanarunum. 

Jesper Steinmetz heldur, at tað er vágið av Trump at boða frá síni ætlan so tíðliga, tí aðrir republikanarar fara neyvan at boða frá síni avgerð fyrr enn í vár ella í summar, og tá er vandi fyri, at Trump ikki fær so stórt uppmerksemi.

Donald Trump var forseti í USA frá 2017 til 2021.

Hann tapti forsetavalið til demokratin, Joe Biden, í 2020, men Trump hevur ongan góðtikið ósigurin.