ES vil hava Russland at rinda fyri krígsskaðar í Ukraina

ES-nevndin kannar nú møguleikan fyri, at Russland skal rinda fyri krígsskaðarnar í Ukraina við peningi, sum gjøgnum tiltøk er frystur í Vesturheiminum.

- Russland skal rinda fyri oyðileggingarnar, sum landið hevur verið orsøk til, skrivaði Ursula von der Leyen, í fráboðan í gjár.

Prísurin fyri at umvæla krígsskaðarnar er 600 milliardir evrur, tað svarar til meira enn 4.462 milliardir krónur.

ES-londini hava fryst gjaldoyrað hjá russiska ríkisbankanum fyri meira enn 2.230 milliardir krónur.

Lóggáva í flestu ES-londunum krevur dómsúrskurð í einum revsimáli fyri at hald skal kunnað leggjast á ognir.

ES-nevndin skjýtur upp, at ein serdómstólur, undir leiðslu av ST, skal stovnast fyri krígsbrotsverk, sum Russland hevur framt.