Gull og silvur til donsku amatørmeistaraheitini

David Kunoy boksaði seg um vikuskiftið til danska amatørmeistaraheitið í sínum vekflokki.

Í finaluni í weltervekt vann hann á Khalid Mukhtar úr Kalundborg, longu í fyrsta umgangi við hørðum slagi í livrina, skrivar Portal.fo.

Í hálvfinaluni fríggjakvøldið vann David Kunoy á einum boksara frá Team Bredahl.


Annand ov stuttur

Teitur Annand boksaði seg eisini í finalu í sínum vektflokki. Tað gekk kortini ikki líka væl sum hjá liðfelaganum.

Føroyingurin megnaði ikki at hótta mótstøðumannin úr Gilleleja, og tapti 4-1 við dómaraavgerð.

Teitur Annand hevur boksað átta dystir og tapt tveir, meðan David Kunoy hevur boksað 10 og eisini bert tapt tveir. Tað er venjarin úr Tórshavn Boksing, Martin Meng, væl nøgdur við.

 - Hagtølini eru framvegis sterk, og vit eru sera nøgdir við avrikið og stríðsandan, sum dreingirnir hava víst í hesum kappingarárinum, sigur Martin Meng við Portalin.