- Tíðindi, mentan og ítróttur
Trýstið á børn og ung skal minka
![](https://kvf.fo/sites/default/files/styles/grein-ovasta-mynd/public/itrottatingok.jpg?itok=m-TRlLYW)
Okkurt bendir á, at økt trýst á børn og ung elvir til skaðar og fráfall í ítrótti. Tí skal føroyskur ítróttur ansa eftir ikki at økja um hetta trýstið, men heldur bjóða eitt frírúm og ein felagsskap.
Tað er høvuðsniðurstøðan frá ítróttatinginum hjá Ítróttasambandi Føroya fyri kortum, sum snúði seg um skaðar, trýst og fráfall millum børn og ung, sum íðka ítrótt.
Eru undir trýsti bæði sálarliga og kroppsliga
Lars Erik Espedalen, ið granskar í barna- og ungdómsítrótti í Noregi, vísti á altjóða rák, har stórur dentur verður lagdur á, at børn og ung skulu gerast betur tíðliga og fylgja eini langtíðarmenning. Hann ávaraði ímóti hesi gongd, sum hann heldur kemur frá altjóða ítróttasambondunum.
Framtíðaravrik og langtíðarmál kunnu geva børnum eina kenslu av, at val og frával á ungum árum eru endalig, vístu Annika Helgadóttir og Monika Mohr, sum hava gjørt eina kvalitativa kanning fyri Fólkaheilsustýrið um sálarliga heilsuna hjá ungum, á. Ung í Føroyum uppliva, at høgar vónir verða settar til teirra, og at hetta skapar eitt økt trýst, helst eisini í ítróttalívinum.
Samlaða trýstið kann føra til mentala og kropsliga ovbyrðan ella fráfall. At liva upp til høgar væntanir krevur meira venjing, sum ofta ikki er nóg fjølbroytt. Kroppurin fær ikki ta hvíld, sum er neyðug, og so koma skaðarnir.
Føroyskir fysioterapeutar síggja, at eitt vaksandi tal og yngri og yngri børnum og ungum venda sær til teirra við skaðum, sum oftast eru úrslit av ov nógvari eintáttaðari venjing. Við rættari og meira fjølbroyttari venjing kunnu minst helvtin av slíkum skaðum fyribyrgjast, greiddu Bjarti Thomsen og Jóhan Esmarsson Heimustovu frá.