Russisk grannalond vilja hava frágreiðing um Navalnyj

Fleiri lond, sum hava landamark við Russland, hava nú sent boð eftir russisku sendiharrunum í londunum. 

Eitt nú Svøríki, Finnland og Litava. 

Londini vilja hava eina frágreiðing frá Russlandi um, hví andstøðupolitikarin, Aleksei Navalnyj, doyði í einum russiskum fongsli.

- Vit vilja áhaldandi mæla til, at allir politiskir fangar í Russlandi verða latnir leysir, sigur finska uttanríkisráðið í skrivligari fráboðan.

Handtikin skulu latast leys

Sama áheitan kemur frá uttanríkisráðnum í Litava, sum ítøkiliga nevnir fangar sum politikaran, Vladimir Kara-Murza, og dokumentaristin, Yuri Dmitriev.

Litava krevur somuleiðis, at øll tey, sum eru handtikin fyri at minnast Navalnyj, verða latin leys aftur. 

Í gjárkvøldið var upplýst, at tað fara at ganga tvær vikur, til familjan hjá Aleksei Navalnyj fær útflýggjað líkið av honum.

Upplýsingarnar komu frá familjuni sjálvari, umvegis eitt talsfólk. Sambært familjuni hjá Navalnyj eru boðini frá russisku myndugleikunum, at líkið fyrst skal kannast, og at hesar kanningar fara at taka 14 dagar.