Ungarn atkvøður um svenskan Nato-limaskap

Ungarska tjóðartingið fer í dag at atkvøða um svensku umsóknina um limaskap í Nato.

Fyrireikingarnar í Brússel eru byrjaðar, og Nato hevur longu gjørt svensku flaggstongina klára, sigur svenska kringvarpið SVT

- Tilgongdin, sum byrjaði fyri næstan tveimum árum síðani, hevur verið merkt av politiskum stríði, valdsstríði og hernaðaravtalum fyri milliardir, skrivar svenska kringvarpið um tilgongdina.

Tað er næstan tvey ár síðani, at Finnland og Svøríki í felag bóðu um limaskap í Nato.

Bara Finnland

Men eftir at Turkaland í fyrstu atløgu ikki vildi geva svium limaskap í Nato, gjørdist bara Finnland partur av verjusamgonguni í fyrstu atløgu.

Turkaland setti seg upp ímóti svenskum limaskapi í Nato, tí Svøríki hýsti limum í kurdiska felagsskapinum PKK, sum Turkaland sigur vera eina yvirgangsfelagsskap.

Í januar góðkendi turkiska tjóðartingið svensku umsóknina, og stutt eftir gjørdu turkar avtalu við USA um at keypa 40 nýggj F-16-stríðsflogfør.