Orban hittir Trump fríggjadagin

Ungarski forsætisráðharrin, Viktor Orban, fer at hitta fyrrverandi amerikanska forsetan, Donald Trump, í Florida fríggjadagin.

Tað sigur talsfólkið hjá Orban við almennu ungarsku tíðindastovuna MTI.

Trump roynir aftur at gerast forseti í USA, og ungarski forsætisráðharrin hevur lovað honum stuðul.

- Vit vóna, at sitandi forsetin fer frá, og at Trump tekur við aftur, og fær fríar hendur at skapa frið í Ukraina, segði Viktor Orban.

Samráðingar kunnu enda kríggið

Forsætisráðharrin er ofta skuldsettur fyri at bróta niður demokratiið í Ungarn. Orban heldur, at samráðingar kunnu enda kríggið í Ukraina, og hann hevur sýtt fyri at senda Ukraina hernaðarligan stuðul.

Eisini Trump og sameindu hansara í kongressini eru ímóti at lata ukrainum meira hernaðarligan stuðul. 

Trump hevur áður sagt, at sær nýtist bara 24 tímar at steðga krígnum, um hann verður forseti aftur í USA.