O.J. Simpson deyður

Fyrrverandi amerikanski fótbóltsspælarin Orenthal James Simpson, best kendur sum O.J. Simpson, er deyður 76 ára gamal.

Tað skrivar familja hansara á sosiala miðlinum, X.

Fyrrverandi ítróttastjørnan bleiv kendur um allan heim, eftir at hann var ákærdur fyri at drepa fyrrverandi konu sína og vin hennara í 1994.

Stórur miðlaáhugi var í málinum og O.J. Simpson bleiv í 1995 fríkendur fyri drápini.

Verjarnir hjá O.J. Sumpson megnaðu at sannføra nevningarnar, at ein rasistiskur løgreglumaður hevði falsað prógvini, sum vóru ímóti honum.

Í 1997 bleiv hann kortini funnin sekur í drápunum, men tað var í einum borgarligum rættarmáli. Hann bleiv dømdur at rinda 33 milliónir dollarar til tey avvarðandi.