Biden sýtir fyri at taka seg úr valstríðnum

Amerikanski forsetin Joe Biden sýtir fyri at taka seg aftur sum forsetavalevni fyri demokratarnar. 

Í samrøðu við ABC fyri fáum døgum síðani tók hann soleiðis til:

Um Harrin sjálvur segði við meg: Joe, tú skalt taka teg aftur, so hevði eg gjørt tað.

Førleikin hjá forsetanum - ella vantandi førleikin - at orða seg týðiliga hevur í seinastuni elvt til stúran og ørkymlan millum amerikansku demokratarnar.

Tað er serliga eftir nógv umtalaða kjakið millum Joe Biden og Donald Trump tann 28. juni, at fólk eru farin at spyrja, um Joe Biden átti at lagt frá sær, og latið onkran annan sleppa framat.

Fleiri framstandandi demokratar hava eisini í døgunum eftir kjakið skotið upp at eitt nýtt valevni sleppur framat.

Men sambært Biden sjálvum verður hetta altso ikki við hansara góða vilja.