Flogskiparar skulu kannast á staðnum

Talan verður um læknakanningar, átøkar teimum, sum ítróttarfólk uttan ávaring skulu góðtaka. Fólk fara tilvildarliga og uttan ávaring at verða vald út og skulu prógva, at tey eru arbeiðsfør.

Tað sigur stjórin í Lufthansa, Carsten Spohr, við týska blaðið Frankfurter Allgemeine Zeitung. Hann sigur, at læknarnir, ið gera kanningarnar - bæði fráboðaðar og ófráboðaðar - verða loystir frá tagnarskylduni og skulu boða frá, um teir halda, at okkurt er áfatt.

Tiltøkini verða sett í verk eftir at 27 ára gamli annarflogskiparin Andreas Lubitz í mars mánað við vilja rendi German-wing flogfarið niður í fronsku alpurnar og tók lívið at hálvt annaðhundrað ferðafólkum, sum vóru á veg úr Barcelona til Dysseldorf. Síðani vanlukkuna hava Lufthansa og mong onnur flogfeløg ásett, at flogskiparin ongantíð skal vera einsamallur. Fer annar flogskiparin t.d. á WC skal ein flogterna inn í stól hansara at sita, meðan hann er úti.

Týska blaðið BILD skrivar, at eitt serflogfar 12. mai fleyg somu rutu sum vanlukkuflogfarið og eftir somu upplýsingum, sum svørtu kassarnir hava avdúkað. Tað hevur ein talsmaður fyri almennu týsku kanningarmyndugleikunum váttað fyri blaðnum, og hetta er partur av kanningararbeiðinum kring vanlukkuna. Øll fólkini, ið vóru við flogfarinum, eru eyðmerkt.