Vilja ikki Danmark - fara víðari til Svøríkis

Síðani sunnudagin eru 3.200 flóttafólk komin til Danmarkar. Av teimum 3.200 flóttafólkunum hava bert 688 av teimum biðið um friðskjól í landinum, sambært NRK.

Flóttafólkini, ið eru komin til Danmarkar seinastu dagarnar, hava størri áhuga at søkja friðskjól hinumegin Oyrasund - í Svøríki.

Talið á flóttafólkum, ið hava biðið um friðskjól í Svøríki síðani sunnudagin, er nú uppi á 1924, sambært svensku myndugleikunum, Migrationsverket.

Nógv flóttafólk í Kastrup

Nógvu flóttafólkini, ið seinastu dagarnar eru komin til Danmarkar, síggjast eisini aftur í floghavnini í Kastrup, skrivar Berlingske á netinum.

Bíðirøðirnar til tokini, ið koyra frá Kastrup til Svøríkis, vóru í morgun langar, tí nógv flóttafólk vildu sleppa við tokinum til Malmø, skrivar blaðið.

Í morgun gav danska løgreglan flóttafólkunum møguleika at ferðast beinleiðis víðari, um flóttafólkini ikki ynskja at biðja um friðskjól í Danmark.