Ebola illgruni ikki av í Noregi

Ein norðmaður, ið seint leygarkvøldið sjálvur setti seg í samband við heilsuverkið í Noregi, skal verða avbyrgdur í 72 tímar áðrenn endaliga úrslitið er tøkt.

Maðurin vendi sær sjálvur til heilsumyndugleikarnar í Bergen, tá hann leygarkvøldið fekk sjúkutekin ið minna um tey, ebola sjúklingar hava.

Læknar á sjúkrahúsinum í Haukeland valdu at avbyrgja mannin, tí maðurin herfyri hevur verið í Sierra Leone. har tamarhald enn ikki er á ebola sjúkuni.

Sjúkrahúsið hevði fyrireikað seg

- Vit hava fyrireikað okkum til støður sum hesa, og vit hava hildið okkum til tær mannagongdirnar, vit hava, sigur Steinar Skrede, yvirlækni á Haukeland sjúkrahúsinum við Bergens Tidende

Hóast fyrstu blóðroyndirnar ikki vístu tekin um at maðurin hevði ebola sjúkuna, so fæst ikki vissa fyri tí fyrr enn týsdagin. Tí skulu fleiri blóðroyndir takast, áðrenn tað kann sigast, at maðurin ikki hevur ebola sjúkuna.

Í oktober í fjør fekk ein norskur lækni staðfest ebola sjúkuna. Kvinnan arbeiddi fyri Læknar uttan landamørk í Sierra Leone, og varð flogin heim til Noregs, har hon fekk viðgerð, og kom fyri seg eftir sjúkuna.