USA ætlar at byggja goymslur til korn úr Ukraina

USA hevur ætlanir um at byggja korngoymslur til 20 milliónir tons av korni í grannalondunum hjá Ukraina, fyri at fáa kornið úr Ukraina.

Tað segði amerikanski forsetin, Joe Biden, á eini ráðstevnu í Philadelphia í nátt.

Átakið skal fáa prísin á hveiti at lækka, og samstundis forða fyri hungursneyð í heiminum, segði amerikanski forsetin.

Hann legði dent á, at USA arbeiðir tætt saman við sínum sameindu um ætlanina.

Verður stór hjálp

Hanna Shelest, sum er verjuserfrøðingur, og hevur støð í Odessa í Ukraina, sigur, at amerikanska átakið verður til stóra hjálp fyri kornútflutningin úr Ukraina.

- At gera goymslur tætt við ukrainska markið, og so koyra kornið til goymslurnar, fer at hjálpa væl, sigur hon. Størsti trupulleikin er at goyma kornið, og tann trupulleikin verður loystur, um goymslur verða skipaðar, sigur hon.

Russland og Ukraina selja umleið ein triðing av hveitinum í heiminum. Ukraina hevur vanliga útflutt kornið við skipi, men tað letur seg ikki gera nú, tí russiski herurin hevur lagt minur í havnirnar.

Síðani kríggið byrjaði, hevur Russland lagt seg eftir at beina fyri ukrainsku korngoysmlunum og ukrainska landbúnaðinum, sigur Hanna Shelest. Hon sigur tekin vera um, at Russland roynir at gera enda á kornútflutninginum úr Ukraina.

Í býnum, Kheron, rændu russisku hermenninir korngoymslurnar, og nú roynir Russland at selja kornið til lond í Miðeystri.

Korn í Ukraina, korn - Mynd: Ritzau Scanpix

Síðani kríggið byrjaði, hevur Russland lagt seg eftir at beina fyri ukrainsku korngoysmlunum og ukrainska landbúnaðinum. (Mynd: Ritzau Scanpix)

Matvøruprísirnir hækkaðir

Ymsar royndir eru gjørdar at fáa kornið úr Ukraina, m.a. við at flyta tað til Eystrasalt, og avskipa kornið haðani. Tað letur seg gera, men nøgdin er nógv minni, enn hon var, tá kornið var flutt gjøgnum Svartahavið, sigur verjuserfrøðingurin.

Russiska innrásin í Ukraina hevur havt við sær, at matrvøruprísirnir eru hækkaðir, tað ger seg serliga galdandi í Afrika og í Miðeystri.

Men eisini um okkara leiðir eru prísirnir hækkaðir munandi.

Landbúnaðarráðharrin í Ukraina, segði herfyri við Reuters, at trot verður á hveiti í minst trý ár.