Nýggja stjórnin vann atkvøðugreiðslu um misálit

Giorgia Meloni, forsætisráðharri, sigur, at Italia tekur undir við tiltøkunum, sum eru sett í verk móti Russlandi í sambandi við kríggið í Ukraina

Í fyrstu røðu síni fyri tjóðartinginum segði Giorgia Meloni, forsætisráðharri, at Italia stuðlar Ukraina, og at landið tekur undir við tiltøkunum, sum eru sett í verk móti Russlandi.

Mynd: Ritzau Scanpix

Sigmar Bláberg

26.10.2022 - 09:16

Nýggja stjórnin í Italia stóð seg væl í eini misálitisatkvøðugreiðslu í undirhúsinum í gjárkvøldið.

235 limir atkvøddu fyri stjórnini hjá Giorgiu Meloni, meðan 154 atkvøddu ímóti stjórnini.

Hennara egni flokkur og flokkar, sum hon samstarvar við, hava meiriluta í undirhúsinum.

Giorgia Meloni og álitisatkvøðugreiðsla - Mynd: Ritzau Scanpix

Tá avtornaði fekk stjórnin hjá Meloni stuðul frá 235 tinglimum í undirhúsinum. (Mynd: Ritzau Scanpix)

Stuðlar Ukraina

Í gjár helt Meloni sína fyrstu røðu í tjóðartinginum, har hon segði, at Italia framvegis fer at stuðla Ukraina, og landið tekur eisini undir við teimum tiltøkum, sum vesturheimurin hevur sett í verk ímóti Russlandi.

Leiðararnir fyri flokkarnar, sum Meloni samstarvar við, fyrrverandi innanríkisráðharrin, Matteo Salvini fyri flokkin Lega, og fyrrverandi forsætisráðharrin, Silvio Berlusconi úr Forza Italia, hava báðir havt góð viðurskifti við Putin, forseta, skrivar Reuters.

Roknað verður við, at ein misálitisálitiskvøðugreiðsla ímóti italsku stjórnini verður í senatinum í dag, men samgongan hevur eisini meirilutan í senatinum.