NATO vil hava Putin at endurnýggja kornavtalu

NATO vil hava Russland at endurnýggja avtaluna um korn úr Ukraina, sum Vladimir Putin, forseti, setti úr gildi leygardagin.

Tað skrivar Reuters.

Putin boðaði frá, at han setti avtaluna úr gildi, samstundis sum hann setti fram skuldsetingar um álop við dronum á herflotan í Svartahavinum, við býin Sevastyopol, sum er á Krim- hálvoynni.

- Putin, forseti, má gevast at nýta mat sum vápn í stríðnum í Ukraina, segði talsfólkið hjá NATO, Oana Lungescu.

Eigur at endurskoða avgerðina

- Vit heita á Putin um at endurskoða avgerðina, og hann eigur at loyva flutningi av korni úr Ukraina, so tað kann koma til tey svongu kring heimin.

Sambært Oanu Lungescu, hevur avtalan um kornflutningin, sum ST og Turkaland slóðaðu fyri, hildið matvøruprísin í eini javnari legu, so prísurin ikki hækkaði óneyðuga nógv, eru boðini frá NATO.

Hóast Russland hevur sett avtaluna úr gildi, so royna Ukraina, Turkaland og ST í felag at fáa 16 skip við korni úr Ukraina.