977 fólk fingu uttanlandsfrádrátt í fjør

977 fólk fingu uttanlandsfrádrátt í fjør, nakað færri enn í 2023, tá tey vóru 1007.

Men inntøkan hjá teimum, sum fingu uttanlandsfrádrátt, var tó størri í fjør. Hon var slakar 682 mió. kr., næstan 22 milliónir meira enn í 2023.

Fiskiveiðufrádrátt uttanlands fingu 148 fólk í fjør. Tey vóru 19 færri enn í 2023.

Og inntøkan hjá teimum var eisini minni. Hon var 135,3 mió. kr., 22,3 mió. kr. minni.

Hesi tølini eru í svari hjá Ruth Vang, landsstýriskvinnu, til Beinir Johannesen, løgtingsmann.

Fíggjarmálaráðið hevur kannað, hvar fólk, sum í 2023 antin fingu uttanlandsfrádrátt ella frádrátt fyri fiskiveiðu uttanlands, búgva í dag. 

Yvirhøvur sæst einki til økta fráflyting eftir at frádrátturin var skerdur, sigur Ruth Vang.