Undirtøkan fyri norska kongshúsinum dalað

Seks av hvørjum 10 íbúgvum í Noregi, 18 ár ella eldri, siga seg stuðla kongshúsinum, og tað er afturgongd. Fyri einum mánaði síðani stuðlaðu sjey av 10 kongshúsinum. Tað vísur kanning, sum er gjørd fyri norska kringvarpið NRK.

Hetta er minsta undirtøkan fyri kongshúsinum, sum Norstat nakrantíð hevur gjørt fyri NRK. Kanningin var gjørd í hesi vikuni, 17. til 19. februar , og 1009 fólk vóru spurd og óvissan er 3 prosentstig.

Stýrisskipanin og kongur

Parturin, sum vil hava øðrvísi stýrisskipan í landinum er farin úr 19 prosentum í januar upp í 27 prosent í februar. Samstundis er Haraldur kongur, sum fyllir 89 ár í dag, framvegis sera væl umtóktur. Norski kongurin fær í miðal 9,2 á einum stiga frá 1 til 10, tá ið spurt verður, hvussu gott umboð hann er fyri kongshúsið. Sonja drotning fær 8,6 .

Krúnprinsahjúnini fáa hinvegin ikki so góð skotsmál. Hákun krúnprinsur fær 7,9 í miðal, - hann fekk 8,8 í seinastu kanning fyri hálvum øðrum ári síðani. Og Metta-Marit krúnprinsessa er farin úr 7,4 í januar niður í 3,7 nú.

Krúnprinsessan undir trýsti

Krúnprinsessan hevur verið í truplari støðu seinastu tíðina, eftir at nýggj skjøl eru almannakunngjørd í málinum móti amerikanska kynsbrotsmanninum Jeffrey Epstein, sum vístu umfatandi samband millum tey bæði. 

Samstundis er sakarmálið móti soni hennara Marius Borg Høiby, sum er skuldsettur fyri fleiri lógarbrot, eitt nú misnýtslu í nærsambondum og neyðtøku, í gongd í landsrættinum í Oslo.
 

Mynd Stuðulin til kongsveldið er minkaður nógv. Men tá fólk verða biðin um at meta um einstøku limirnar í kongsfamiljuni, fær Haraldur kongur næstan toppstig. Hendan myndin er frá tá kongur og drotningin, krúnprinsurin Ingrid Alexandra og Sverre Magnus prinsur vitjaðu í Stavanger í juli í fjør.