Føroyskt mynstur í landsliðsblusu

Blusurnar, sum føroysku hondbóltsspælararnir fara at skjóta mál, takkla og bjarga í til heimsmeistara- og evropameistarakappingarnar í vetur, vóru avdúkaðar við Tjarnir í Havn um vikuskiftið.

Nýggju landsliðsklæðini eru sniðgivin við íblástri frá landsliðsblusuni frá 1986, og sermerkt nýtt hondbóltsbindimynstur frá Navia er eisini við á blusuni.

 - Vit fóru so í gongd við at útvikla eitt mynstur, og tað var Elisabeth í Gong, sniðgevin hjá Navia, sum sat og arbeiddi við tí, og úrslitið var so tað, at vit komu við einum hondbóltsborda, sum er tað almenna hondbóltsmynstri, segði Óli Jákup á Torkilsheyggi.

 - Mynstri hevur bæði rundan og kantuttan form, sum eisini kann mynda bóltin og mynstri á bóltinum, og at bólturin er í málinum, segði Elisabeth í Gong.

Í sama viðfangi hevur Navia framleitt eina troyggju við sama serstaka mynstri. Ein troyggja, sum føroysku hondbóltskvinnurnar skutu upp, tá tær kappaðust til EM í Basel síðsta ár.

 - Gunn Ellefsen, forkvinnar í HSF, prátaði við nakrar av kvinnunum. sum vóru til EM niðri í Basel, og tær søgdu, at tað var eitt sindur keðiligt at renna runt í syntetiskum klæðum í kuldanum har niðri, og tær kundu hugsað sær at havt eina góða føroyska troyggju afturat í øllum førum, greiddi Hallur Danielsen úr HSF frá.

 - Vit spurdu um at fáa føroyskar troyggjur, tá vit vóru í Basel, so tað gleði eg meg til at fáa nú, segði Bjarta Johansen, landsliðsspælari.

Mynd: Andrei Antal/HSF