Helgi L. Petersen: NSÍ tekur stórt stig rætta vegin

NSÍ fótaði sær aftur í fjør eftir eitt ár í næstbestu deildini, og nú er felagið til reiðar at taka enn eitt fet uppeftir. 

Tað segði Helgi L. Petersen í 3-2 mánakvøldið.

NSÍ hevur styrkt seg á fleiri plássum. Millum annað eru Jann Benjaminsen og Michal Przybylski komnir, men størsta navnið er uttan iva landsliðsmiðvallarin Brandur Hendriksson Olsen, sum er komin aftur til Føroya eftir 15 ára fótbóltsútlegd.

 - Tað er ein fongur. Tað er kanska ein av teimum allarbestu fótbóltsspælarunum, sum eisini ger nakað við venjingarumhvørvið og fatanina av, hvar tú kanst spæla við, segði Helgi L. Petersen.

 - Tað er eitt týðiligt tekin um, hvønn veg mann ætlar sær. Eftir at hava verið í næstbestu deildini og vent, fótaði mann sær í fjør, og so var spurningurin, hvat hendir næst. Tey flestu væntaðu, at mann ætlaði at taka eitt stig rætta vegin, og hetta bleiv so eitt stórt stig. Hvør veit, um hetta kanska bleiv tvey stig í einum, men tað fáa vit at síggja, segði Halgi L. Petersen.